Lemos poesía en voz alta

O pasado 31 de marzo celebramos o II Concurso de Lectura de Poesía en voz alta. Contamos con 22 participantes, que se esmeraron en ler en voz alta con fluidez e expresivividade. Moitos deles escolleron poemas de Gloria Fuertes e de Manuel María, a quen adicamos o mes de marzo. Aquí tedes o video coa súa lectura:

Razóns para ler

O alumnado de 6º de primaria está cumprindo o seu terceiro ano como auxiliares de biblioteca. Como alumnos e usuarios da biblioteca, e agora que xa lles queda pouquiño para emprender a viaxe ao Instituto, queren compartir con nós a súa experiencia. Cóntannos as súas razóns para ler:

Celebración do Día do Libro Infantil e Xuvenil

Na anterior entrada, anunciabamos a celebración do Día Internacional do Libro Infantil e Xuvenil. Na escola foi un día especial porque recibimos a noticia de que Saray Díaz, unha compañeira nosa, foi seleccionada por "La Atrevida" para publicar o seu conto "A balea chea" na súa "Antologia", na que o conto de Saray vai aparecer xunto cos de outros escritores e escritoras de todos os currunchos do mundo onde se fala a mesma lingua que a nosa: Brasil, Cabo Verde, Portugal, Macau, Angola,... un orgullo para todos nós!

Recibimos a chamada de Radio Nordés para falar da celebración, e aproveitamos para dar a primicia. Saray foi entrevistada en directo e explicou o seu conto para que todos o puidésemos coñecer. Aquí tedes a gravación.

Día Internacional do Libro Infantil e Xuvenil

O día 2 de abril de 1805 naceu en Odense (Dinamarca) Hans Christian Andersen. De maior convertiuse nun famoso escritor, e todos coñecemos moitos dos seus contos. Por iso, como cada 2 de abril, celebramos o seu aniversario como o Día Internacional do Libro Infantil e Xuvenil. A IBBY (Organización Internacional para o Libro Xuvenil) encarga cada ano a un país a redacción dun texto e a súa ilustración para divulgala por todo o mundo. Este ano, o país escollido é Irlanda. 

A escritora Siobhán Parkinson, gañadora do Premio na nÓg, foi  a encargada de redactar esta carta, e a escritora e ilustradora Niamh Sharkey a creadora da súa imaxe. A tradutora do texto ao galego foi a escritora Concha Blanco.

PLAMBE

Este escueto título responde á síntese das palabras "Plan de Mellora de Bibliotecas Escolares", impulsado pola Consellería de Cultura e Educación desde hai nove anos. O xoves e o venres pasado desenvolvéronse os Encontros do Plan de Mellora en Santiago de Compostela e a eles asistimos os responsables de 524 bibliotecas escolares galegas. Sempre é agradable encontrarse con compañeiros e compañeiras que comparten o seu traballo a diario na tarefa da biblioteca, pero o máis destacado este ano foi darlle unha volta de porca máis e falar da ciencia na biblioteca e da ciencia como cultura. 

O catedrático de Física Jorge Mira abriu a xornada do venres para falarnos da ciencia na biblioteca. A súa exposición foi tan atractiva e amena que case chegamos a sentirnos especialistas en ciencia!

Emociona saber que compartimos a idea de biblioteca que queremos poñer en práctica. A prevalencia da divulgación sobre o rigor foi unha das mensaxes que quedou máis clara da súa exposición. Facer sinxela e atractiva unha materia que parece tan abstracta non resulta fácil, pero el consígueo con unha facilidade sorprendente. 

O peche da xornada estivo a cargo do catedrático Antonio Rodríguez de las Heras, que nos fascinou coa súa charla sobre "O lugar da biblioteca na sociedade tecnolóxica". Aprendemos moito de persoas tan sabias, que nos comunican con claridade e sencillez o que coñecen. 

E ti.... por que les?

Despois da celebración da poesia coa chegada da primavera, e sabendo que se achega o Mes do Libro, iremos "quentando motores". Na nosa breve experiencia formando este Niño fomos testigos do pracer que esperta a lectura entre os nosos usuarios. Pero nunca preguntamos por que. Este é o momento e lugar de contalo. Tedes á vosa disposición na biblioteca as tarxetiñas para responder, e aquí enriba á dereita, o enlace onde premer por se non podedes vir recoller a tarxeta. Desde a vosa casa, desde o voso traballo ou desde o voso móbil, esteades onde for, podedes contestar á pregunta:

Día da Poesía

O pasado 21 de marzo celebramos o día da poesía. Comezamos a tarde co tradicional concerto da Chiquitropa Mozartín. Ofrecéronnos unha preciosa canción para ir quentando o ambiente.



 Logo, todos os que quixemos participar lemos o noso poema favorito. Se vos fixades, escoitamos moitos de Manuel María e Gloria Fuertes, os poetas homenaxeados neste ano 2014.