Desde 1997 a Asociación Española de Amigos do Libro Infantil e Xuvenil promove a celebración do Día da Biblioteca, en conmemoración do incendio da Biblioteca de Saraxevo durante a Guerra dos Balcáns, en 1992. Despois deste brutal ataque, o médico e historiador croata Mirko D. Grmek acuñou o termo memoricidio para definir a destrución da memoria e o tesouro cultural do “outro”, do adversario, do inimigo. (1)
Neste ano, o lema escollido é "Contra a desinformación", tendo en conta que nas bibliotecas podemos atopar a resposta a todas as preguntas e dúbidas que se nos plantexan diante de noticias falsas. Segundo o manifesto IFLA-UNESCO sobre bibliotecas escolares :
"Nun contexto onde a información evoluciona rapidamente e as novas tecnoloxías conlevan oportunidades e desafíos, o rol da biblioteca escolar na colaboración activa para fomentar a alfabetización, o pensamento crítico, a creatividade e a cidadanía global a través dunha educación inclusiva e equitativa é máis importante que nunca". (2)
Mañá, 24 de outubro, celebraremos un Día da Biblioteca especial. Imos darlle o toque final á nosa reforma, que nos leva ocupando os últimos 4 anos, e recibiremos nela a persoas que estiveron acompañándonos no proceso, desde a Administración Local ata a a Administración Autonómica.
Para que todos participemos dun xeito ou doutro, propuxemos que pensásedes nunha situación nova: "Que pasaría se non tivésemos a biblioteca?"
Agardamos polas vosas respostas, que van ser expostas tamén no interior da biblioteca.
(1): https://www.biblogtecarios.es/luciadominguez/24-de-octubre-dia-de-la-biblioteca/
(2): https://www.edu.xunta.gal/biblioteca/blog/?q=node/1843
